متيلا بينا

متيلا بينا

تيجي نخلد اسامينا

تيجي نكتبها علي سفينة

ونركبها وتودينا

ترسي علي اي مينا

والطير يرفرف حوالينا

ونبص للسما نمدلها ادينا

تبتسملنا وترد علينا

تؤمر سحابها يمطر علينا

نمسح بالمية ذنوب ادينا

ننور بيها ضلمة عنينا

نزرع بيها جنينة

نحلم فيها بامانينا

نحققها بادينا

نحاول نعمل اللي علينا

نغير اللي فينا

هنبقي احسن صدقيني

والناس هتعرفنا وتشاور علينا

ووقتها مش مهم اسامينا

متيلا بينا

طب ماتيجي نوشوش رملة البحر

نقرب ودننا منها نسمع السر

تحكي ونحكي حكاية العمر

حاسبي ودنك دة جمر

مش باديها دة قدرها وامر

الناس بتفتكرها حرة والبحر حر

لكن حرية مسجونة طعمها مر

حكاويهم لا عدو ولا حبيب تسر

هما كدة مش عاجبهم حالهم

كل يوم خناقة بين الرملة والبحر

لا الرملة في المية ولا البحر علي البر

متيلا بينا

تيجي نبني لينا قصر كبير

انتي اميرتو وانا الامير

ويبقا لينا حرس وجنود كتير

وسرنا مابينا في بير

تفتكري كدة هنعيش في امان

يعني القدر هتوقفو قضبان؟

حتي لو كل يوم فمكان

حتي لو غيرنا الزمان

بردو القدر ورا كل انسان

متيلا بينا

طب ماتيجي بادينا الهوا نحضن

ولو حكمت ندخل ونسكن

ولا نتجنن وعلهوا نكتب

ونفكر في بكرة والنهاردة نقلب

وبالورقة والقلم نحسب

نصارح بعضنا مش نكدب

نقوي حلمنا وخوفنا نغلب

ووقتها هنقدر الهوا نحضن

وناخد مفتاحو وجواة نسكن

متيلا بينا

علي مية النيل بخوصة نرسم

نتخيل كدة ونحلم

منخبيش حاجة ولا نكتم

او ننزل بهدومنا في المية

اجي احضنك تطرتشيني بالمية

يلا بقة تيجي نريح شوية

نبص علمراكب اللي رايحة واللي جاية

نتغطي بشراعها اللي في الهوا هفهف

نصور الطير اللي فوقها بيرفرف

لحد مايفضي النيل وعلينا يصفصف

ونطلع في الشمس ندفى

نهرب من الناس ونتخفي

لحد يفرح فينا يتشفي

ونرجع حياتنا من تاني

نحقق فيها الاماني

ولو فشلنا نحاول تاني

عشان ننجح لازم نعاني

دي القرون اصلها ثواني

متيلا بينا

ولما نعمل اللي في نفسنا

ونحقق حلمنا

هنصلح اللي فينا

نعمل اللي علينا

ونقدر نحضن الهوا

ونفضل طول عمرنا سوا

ونعرف لغة الرمل

ونعرف السر

ونزرع بمية النيل

نخلي الاخضر ضي الليل

وقتها نبقي كتبنا  وخلدنا اسامينا

هحكيلك يا بلد عن اهلك وعن ناسك

احكيلك يا بلد عن اهلك وناسك

هوة احنا اللي فاهمين البلد ولا تكونش هية اللي فاهمانا

ساعات تلطش فينا بالقوي وساعات تيجي علي هوانا

طب نقول اللي فينا ولا هية خلاص شايفة اللي جوانا؟؟

توهة وزحمة وخنقة والخلق من عيشتهم قالو اة ياانا

ادي يا بلد ولادك واخد منهم شوية اويكي اللي فيهم

اشوفك بقة هتصلحي حالهم ولا كالعادة هتسيبيهم

ومتقوليش انت جايبلي الوحش واللة دول علي الفرازة منقيهم

دة عم حسين بتاع الفول زاقق العربية ونفسو في حمار

مش فارقة معاة ياستي اعرج ولا في رجلو مسمار

يشيل عنو تعب الزق والبهدلة وقت الفجرية ووقت النهار

قاعد يغني وهوة ماشي بيسلي نفسو والدنيا فوقة حر نار

اية هنبدا نحمرق ماااااشي سيبك منو .. امشي يا عم ...اهو غار

ادي ((عكاشة بية )) هوة موظف بسيط لكن النئب بية

لابس ومتقيف ظابط ومتكيف تقولش باشا!! ولا اية؟؟

يصحي من نومو يلبس هدومو يبص فهدومو يلاقي جنية

ياخدها مشي مش حمل تاكس ييجي ربع ساعة لا قول نص

شادد نفسو عادل جسمو يقول للي ما يشتري بعينو يبص

كل اللي فية لا لاقي شغل يحترمو ولا لاقي غير الجنية

اية يا بلد هتفاصلي في دة كمااااااااااااااان ولا اييييييييية

وادي يا سيدي ((الست سنية)) ماتخافيش يا بلد دي مش بتاعة الحنفية

دي واحدة في حالها كل اللي جرالها جوزها ((سيد)) مات بعد العملية

لا بسيطة دخل عشان الفتاء شالولو الكلة والمرارة بس اية بقة مية مية

اصلو يا عيني عملها في الاميري ودول اية بقة دكاترة وبعد الضهر حرامية

اية؟؟؟ هوة اللي غلطان  ههههههه صحيح اية اللي وداة يعمل العملية

طب يعمل اية ماهو ممعهوش يسرق يعني ولا يطلق الولية

سيبك يا بلد من سيد واللي حصلو الراجل اللة يرحمو خلينا في سنية

اهي دي بقة يا بلد علي اد حالها شغالة بتسرح الشعر في الكوافير

راضية وحامدة ربها ازا كان معاها قليل ولا  لاسمح اللة معاها كتير

كل حلمها راجل يحبها محبكتش يعني فارس ولا امير

بس المصيبة ان بختها وقع في حبها ههههه حسونة الغفير

ازيك يا عم كيمو مقولكش بقة يا معلم علي عمك كيمو

راجل مظبط مروق مطرقع بس عايش علي قديمو

ضارب القرش لافف الجوينت معة التذكرة شادد من مناخيرو

واخر اليوم يا معلم راجع ومتسلطن شادد لحافو نايم علي سريرو

والشيخ صالح راجل تقي عايش في حارة وحياتو عال العال

حافظ كتاب اللة وفاهم الناس اصل شيخنا كان في القديم بقال

شايف الناس ماشية تايهة عن دينها واللي يضرب يقلب ولا علبال

هيعمل اية يعني ما هية دي الناس وهوة دة الحال وهوة دة اللي شغال

ادي يا بلد ناسك وحالك ومالك سيبك بقة ممكن سؤاااااااال؟؟؟

احنا هنفضل كدة يا نصاب يا قونطجي يا عابر سبيل يا رحال ؟؟؟

اعملك اية يعني يا بلد واللة دة اللي موجود فيكي قدامنا وورانا

هما دول قرايبي ماهية الخلق اللي كدة شاربة المر وعيانة

وكمان مش عاجبك مش كفاية راضيين بيكي وانتي كمان اللي زهقانة؟؟

انا مش هرد عليكي كفاية اللي فينا مكفينا

سيبك بقة مني والنبي كفاية دة الهم مالينا

وكل ما نكلمك تقولي بالراحة دة احنا في سفينة

مبلاش انتي والسفينة ولا انتي نسيتي العبارة واللي حصل لاهالينا

دة ناسك طهقو طب حتي في الصيف ضللي علينا ولا في الشتا غطينا !!!

ياااااااااااااة يا بلد دة انتي فيكي العبر شايفة كل دة فينا وراميانا

والنبي سؤال اخير مش مزاولة هوة احنا اللي فاهمينك ولا انتي اللي اشتغالة ومش فاهمانا؟؟؟؟؟؟